Nuna vieya viesca milenaria, nuna non mui alloñada provincia del norte, ente vieyos carbayos albares y venerables castaños a la solombra de les dulces fayes habiten n’harmonía un incuntable númberu d’animales; el noble corzu de tiesta coronada, l’esguil llaboriosu, el fanfarrón osu pardu, el testerón xabaril, l’esnidiosu gallu montés, el tímidu corcuspín, l’astuta raposa y nel arroyu les incansables llóndrigues que se somorguien una y otra vegada nel agua cristalino onde canten les xaronques y sobre la copa de los árboles so maxestá l’águila real qu’estiende les sos ales protectores, mentanto nel furacu d’un tueru secu la sabia curuxa espera a la lluna y na mullida escuridá de la so madriguera mama topu cuida de les sos críes. Les abeyes abeyaben de flor en flor.
Dicen que foi ella, la ciega mama topu la primer en goler la so presencia y dempués los páxaros dieron l’alarma y l’esguil mangáu no cimero d’un árbol pudo ver el fumu y les primeres llames. Y la noticia espardióse como escalofríu per tola viesca; los animales amedrantaos entamaron a fuxir , dexando atrás les sos madrigueres, los sos niales, los sos refuxos, la cebera que guardaben pal iviernu, encarando un futuru inciertu. Sedrán los nenos los encargaos de guialos a un llugar seguru protexíos de les llames y tendrán que concienciar a toos de que traxedies como esta nun puen volver a asoceder.
La lluvia mató la quema. Un tímidu rayu de sol abrióse pasu pente les nubes y salió l’arcu la vieya. El vientu trayía yá aires de cambéu.
Un brotu nació dempués de la lluvia y l’abeya ximielgólu.
Hai esperanza.
FICHA ARTÍSTICA
Espín, el corcuspín: Mario Villar / Rosa Ana Muñoz
Pícara, la raposa: Sheila Montes
Fulgor, el fueu: Lucía Colunga
Hugo, el curuxu: Lucía Colunga
Vestuariu: Azucena Rico
Escenografía y atrezu: Nuria Trabanco
Diseñu d’illuminación y técnicu: Alberto Ortiz
Fotografía: Noé Baranda
Diseñu Gráficu: Espiral8
Audiovisuales: Noe Baranda y Carlos Arias Cancio
Baille y coreografía: Lucía Colunga, Alma Funky
Torna´l asturianu: Marián Rodríguez
Música: Valeria Val
Producción: ElektraFiktion
Autoría y Dirección: Rosa Ana Muñoz
